Income Tax: రూ. 7 లక్షలు, 14 లక్షలు, 21 లక్షలు.. ఎంత జీతంపై పాత, కొత్త పన్ను విధానంలో లెక్కలివే..

Author : Jnanaloka Published : March 09, 2025

You might be interested in:

Sponsored Links

 New Income Tax Regime: కొద్ది రోజుల కిందట బడ్జెట్‌లో కేంద్ర ప్రభుత్వం టాక్స్‌పేయర్లకు శుభవార్త అందించిన సంగతి తెలిసిందే. కొత్త పన్ను విధానంలో టాక్స్ రిబేట్ భారీగా పెంచింది. అంటే రూ. 12 లక్షల వరకు ఆదాయంపై టాక్స్ చెల్లించాల్సిన అవసరం లేదని స్పష్టం చేసింది. ఇదే సమయంలో వేతన జీవులకు అదనంగా రూ. 75 వేలు స్టాండర్డ్ డిడక్షన్ కలిపి రూ. 12.75 లక్షల వరకు ఆదాయంపై పన్ను చెల్లించాల్సిన పని లేదు. ఇది కొత్త పన్ను విధానం ఎంచుకున్నవారికి మాత్రమే. ఇదే సమయంలో పాత పన్ను విధానంలో మాత్రం ఎలాంటి మార్పులు చేయలేదు. ఇక్కడ టాక్స్ రిబేట్ రూ. 5 లక్షల వరకే ఉంది. స్టాండర్డ్ డిడక్షన్ కూడా ఇక్కడ రూ. 50 వేలుగానే ఉందని చెప్పొచ్చు. అయితే ఇప్పుడు ఆర్థిక సంవత్సరం ముగిసేందుకు సమయం దగ్గరపడుతోంది. మరి.. ఏప్రిల్ నుంచి ఐటీఆర్ దాఖలు చేయాల్సి ఉంటుంది. అయితే కొత్త పన్ను మార్పులు.. 2025-26 ఆర్థిక సంవత్సరం నుంచి అమల్లోకి వస్తాయి. దీని కింద ఎంత ఆదాయంపై పన్ను లెక్కలు ఎలా ఉన్నాయనేది చూద్దాం.

ప్రతిపాదిత కొత్త పన్ను విధానం ప్రకారం.. నాన్ శాలరీడ్ ఇండివిడ్యువల్స్‌కు రూ. 12 లక్షల వరకు టాక్స్ లేదు. ఇదే సమయంలో రూ. 12.75 లక్షల ఆదాయంపై వేతన జీవులకు టాక్స్ సున్నా. ఈ లెక్కలతోనే ఇప్పుడు మనం పాత పన్ను విధానం, కొత్త పన్ను విధానం (రూ. 7 లక్షల వరకు టాక్స్‌రిబేట్), ప్రతిపాదిత కొత్త పన్ను విధానంలో (రూ. 12 లక్షల వరకు టాక్స్ రిబేట్) ఎంత ఆదాయంపై టాక్స్ ఎంత పడుతుందో చూద్దాం.

మనం ఇప్పుడు వేతన జీవులకు (శాలరీడ్ ఇండివిడ్యువల్స్) పన్ను లెక్కల గురించి తెలుసుకుందాం. ఇక్కడ పన్ను వర్తించే ఆదాయం నుంచి రూ. 75 వేలు స్టాండర్డ్ డిడక్షన్ తీసేసి లెక్కలు వేశాం.

>> రూ. 7 లక్షల ఆదాయంపై పాత పన్ను విధానంలో రూ. 44,200 టాక్స్ చెల్లించాలి. కొత్త పన్ను విధానం, ప్రతిపాదిత కొత్త పన్ను విధానంలో టాక్స్ చెల్లించాల్సిన పని లేదు.

> రూ. 14 లక్షల ఆదాయంపై చూస్తే.. స్టాండర్డ్ డిడక్షన్ పాత పన్ను విధానంలో రూ. 50 వేలు, కొత్త పన్ను విధానంలో రూ. 75 వేలు తీసేసి లెక్కలేయాలి. ఇక్కడ పాత పన్ను విధానంలో రూ. 2,26,200 పన్ను పడుతుంది. కొత్త పన్ను విధానంలో రూ. 1,09,200; ప్రతిపాదిత కొత్త పన్ను విధానంలో రూ. 81,900 టాక్స్ పడుతుంది. ఇక్కడ ఉదాహరణకు రూ. 14 లక్షల ఆదాయంపై ప్రతిపాదిత కొత్త పన్ను విధానం ప్రకారం.. స్టాండర్డ్ డిడక్షన్ రూ. 75 వేలు తీసేస్తే.. రూ. 13.25 లక్షల ఆదాయంపై లెక్కించాలి. దీనిపై రూ. 78 వేలకుపైగా టాక్స్ పడగా.. 4 శాతం సెస్‌తో కలిపి రూ. 81,900 పడుతుంది. ఇలాగే అన్నింటికీ లెక్కించాలి.

>> రూ. 21 లక్షల ఆదాయంపై చూస్తే పాత పన్ను విధానంలో రూ. 4,44,600; కొత్త పన్ను విధానంలో రూ. 3,09,400; ప్రతిపాదిత కొత్త పన్ను విధానంలో రూ. 2,14,500 టాక్స్ పడుతుంది.

>> రూ. 28 లక్షల ఆదాయంపై వరుసగా రూ. 6,63,000: రూ. 5,27,800; రూ. 4,13,400 పన్ను పడుతుంది.

>> ఇదే విధంగా రూ. 35 లక్షల ఆదాయంపై పాత పన్ను విధానంలో రూ. 8,81,400; కొత్త పన్ను విధానంలో రూ. 7,46,200; ప్రతిపాదిత కొత్త పన్ను విధానంలో రూ. 6,31,800 గా పన్ను పడుతుంది.